رات مبشر کے پرانے دوست آئے ہوئے تھے۔ سردار ٹونی سنگھ کوئی 20 برس بعد مل رہا تھا۔ بہت سرور اور لطف کی کیفیت رہی تھی۔ شاندار رات گزری۔
صبح اٹھ کر مبشر نے فورا رات کو پی جانے والے شراب کی بوتلوں کی تصاویر تین اشعار کے ساتھ اپنے سوشل میڈیا پر چڑھائیں اور پارٹی کرنے والے خواتین کے چہرے دھندلے کر کے لگائے۔
کامنٹس میں تعریفوں کے ڈھیر لگ گئے۔ سوشل میڈیا کے “دوست” مسلسل شاباشیاں دے رہے تھے۔ شراب اور جنس کی تعریف میں تاریخی حوالوں سے تھوڑی بہت گفتگو بھی جاری تھی۔
مبشر یہ سب دیکھ کر بہت خوش تھا۔ اس نے فورا پارٹی کے تین چار دوستوں سے اپنی پوسٹ شیئر کرنے کو کہا۔ سردار ٹونی سنگھ کو بالخصوص کہا کہ اس کے ساڑھے چھ لاکھ فالوورز تھے۔
مبشر اک سرشاری میں تھا۔ اس کے لبرلزم کا بپتسمہ مکمل ہو چکا تھا۔ اب وہ مِٹھو بٹ کی ہٹی سے نان چھولوں کا ناشتہ کر سکتا تھا۔